♦ حلم العمر ♦
بَنُّوتَه عيونها سهرانه
ورموشها معاها حيرانه
عدَّا عليها الهوا
م العشق بردانه
بتدوًَر فى أحلامها
كتيره ليه أحزانها
يا مين يرأُف بحالها
ويرسم ليها أفراحها
بصّا فى سما الأيام
شايفه نجوم الليل
مش لقيا بينهم قمارها
فى قلبها تشيل اسمه
يكون جوّاها قمر ونَّاس
لا يهمها الدنيا
ولا حتى كلام الناس
ما ياما طفُّوا أنوارها
وباقى ليالى العمر
يا مين بحنانه
يونّسها
يضمها
يلملمها
وفى وحدتها يحضنها
تقف على شط
بحر الحياه الغدار
تشرب من قسوة الحرمان
تمسح على الشط رمله
ويعدِّى معاها الزمان
تحاول تسبح لِ تنسَى
اللى ضاع
واللى باع
واللى فات
من سكات
حتى من غير كلمة وداع
اللى كسر خجل السنين جواها
واللى بعد الحب
كان الهجر جزاها
وتضيع أسباب الفرحه معاها
ويعُود كحل العين ويَّاها
يا مين يِنْدَه للقاها
تشُوف فى عنيها كلام
يِوْجَع
والقلب منه ينُوح
ورغم إن دموعها قريّبه
بتعيش بقلب برىء
لا يمكن باللى فيه هتبُوح
وناس تقول
ذنبها على جنبها
وتبكى جواها الوعود
لما تقول
قسمتى ونصيبى
ويبقى شىء خلاص مفقود
والذنب عمره ما كان ذنبها
يفتفت قلوبنا
البكى على حالها
ماهو محدش مرتاح
ولا عامل يوم حسابها
سهم الهوى دايماً دابح
وكل ما فيه وقت ورايح
جواها يا عيني أوجاع بالكُوم
وكل ما فيها بيصرخ مهمُوم
الحزن عليها يتلوِّن
والوحده قاسيه ما تهوًِن
فرحتها يا دوب يومين
وجرحها عايش جوَّاها سنين
تحضن بإيديها غُربتها
وكأنها خايفه خسارتها
يا مين بموَدته يِسَتّرها
دا مفيش اللى يعوَّض دفاها
ولا إحساس بضمتها
ولا ملايكة ضحكتها
يا مين يفصَّل لها فستانها
والتاج اللى فوق راسها
وعلى ورقة فرح
إمضتها بضحكة ملامحها
وهناك تبدأ حياتها
وفى لحظة صدق مع نفسنا
هانقر ونعترف
باللى لا يمكن عليه نختلف
بوجودها الدنيا أحلى
ومعاها العيشه تحلى
ما هى أجمل نص يضمنا
♦ خواطر قلمي ♦
طارق على جاب الله
ليست هناك تعليقات:
إرسال تعليق