( تنافيس زوج قهران )
يا عمي سيبني الله يهديك
النفس ماظه ومش حملاني
بقيت فرخه ومرتي الديك
احضر واغيب دايما هملاني
لو اطلع فوق تنزل تحت
لوامشي شمال تحدف ليمين
ومهما اردم تنزل فحت
احلف بطلاق تحلفلي يمين
ليلها بطوله فاتحه الفيس
تنام الصبح وتصحي العصر
وكاني معزه وهيا التيس
كرهت وجودي معاها ف قصر
نفسي طلبت أكلة باميه
عملتلي زيطه وهليلا
واغمى عليها ف لمحه وثانيه
وفضلت نايمه وضاعت الليله
مهما أطبطب مهما أحايل
مهما أنصح مهما أقول
أتاريني ببني ف ساس مايل
وكلامي طلسم ومش معقول
مرتي معايا خلف خلاف
وكأني واخدها تخليص حق
نهارنا وليلنا زعيق و خلاف
وتطلع دايما صاحبة حق
بيتي جنه لكل اخواتها
نار وجحيم علي أهلي وناسي
يا رب عدي بقيت سنواتها
يا تقبض روحي مع أنفاسي
شعر / عبد الرسول كريم
تحريرا في 17/8/2020 م
ليست هناك تعليقات:
إرسال تعليق