فلنتاين
إجه عيد المحبة يهني المحبين
سلة ورد بيده وعلخَلَكْ يفتر
ظنيتَه يمر بيه مثل هالناس
عيني على الدرب كاعِدَه وأتنَطَرْ
شفتَه من بُعِدْ وزع على العشاك
من ورد المحبة الكله لونه أحمر
خطواته سريعة ومر عل يحبون
أشو يم باب بيتي ولنّه يتعَثر
لاوردة محبَة إنطاني لادبدوب
صُفَن صَفْنَه عليه ودمعَه يتوجر
كال بهَمِسْ جن ليلَك طويل أعليك
صِحِتْ كِلِشْ طويل ولافَجِر ينَطْر
آذَتْني ليالي الشوك للناسين
ونيران الفراك شما طوَل تِسْعَرْ
ما أعتِب عليهم أدري مو بالبال
اليحِب من طرف واحد حيل يتمَرْمرْ
فلنتاين بقه لحَدْ الصبح وياي
يواسيني وعليه هواي يتحسَرْ
مِشا خطوات عني ورَدْ سأل محتار
عَجَب هذا الحنان البيج ماأَثَر؟
كِلِتْ عِزَة نَفِس سَدَتْ لي فيض الشوك
اليصِدْ أشواكة شوف شلون يتْغَيّر
روح وداعة الله وسلِتَك وياك
بلكي السنة الجاية اليابس يخَضِرْ
(آمال الفراتي)
ليست هناك تعليقات:
إرسال تعليق