ياقلبى طريقك مهجور.....عادل عبد الرازق

يا قلبي طريقك مهجور
-------------------
بقلمي - عادل عبد الرازق
----------------------
مهجور ...
يا قلبي طريقك مهجور
ماشي بتدوّر ليه
والضلمة بلون النور
مهجور ...
يا قلبي طريقك مهجور
رحّال في مداينك رحّال
يا قلبي وبتلفّ وبتدور
وتلاقي نفسك في مكانك
وفي نفس الديرة بتدور
مهجور ...
يا قلبي طريقك مهجور
ماشي بتدوّر ليه
والضلمة بلون النور
مهجور
طول عمرك يا قلبي حزين
طول عمرك بجناح مكسور
منفي
مكفي
متهجّر
متكسّر
وهزيمتك حواليك داير ما يدور
وتدور ..
يا قلبي وتدور
وتعدّي السكّة لسكّة
وتعدّي السور تلاقي السور
ولا قادر تنسى ملامحها
ولا عارف تنسى هواها المغرور
مهجور ...
يا قلبي طريقك مهجور
مكسور في ماضيك وبتحلم
والحلم يا قلبي مبتور
ولا قادر تحيا الحاضر
ولا ترجع للماضي المسحور
ولا قادر تسكت
ولا قادر تتمرّد
ولا عارف حتى تثور
مهجور ...
يا قلبي طريقك مهجور
لا بكلمة حزينة اتودّعت
ولا حتى رسالة ولا سطور
ولا ذنبك إنك أخلصت
وما خونت
ولا كانلك في قرارها دور
غير إنك في هواها مسجون
وما بين أسوارها مأسور
مهجور ...
يا قلبي طريقك مهجور
لا وشوش حواليك
ولا ناس في عينيك
ولا بيوت ولا أبواب
ولا ضيّ ولا نور
كله سكات في سكات
كله دموع وذكريات
ودواير حواليك بتدور
مهجور ...
يا قلبي طريقك مهجور
------------------
عادل عبد الرازق
**************