رفقًا يا شتاء
السيد فريج
ــــــــــــــــــ
حتى الحجر
داب م المطر
واحنا قلوبنا اتحجرت
وحتى عقولنا اتسكرت
شايفين ولادنا
متجمدين
دول مش اعادي
ولا مجرمين
في الخيام ميتين
من الجليد
متقطعين
والايادي
اتكسرت
واتقصرت
مش ممدودين
لا قلنا كلمة
ولا عقولنا فكرت
هو احنا ناس
والا خلاص
ماتت عيونَّا
ولا شفنا حُسنة
ولا ياسين
وادي حنين
قعده بتسأل
بين الألم
ويا الأنين
يامجرمين
احنا اتخدنا
بذنب مين
كمان قلوبنا
مضلمة
لا حاسه بيهم
ولا أبصرت
السيل جرفهم
والرعشة جاتهم
وبأي ذنب
نادرة بتصرخ
ولا رد جالها
ولا حد قالها
إنتِ فين
وحضن اخوها
حيدفي مين
والَّا مين
ماهو ثيابه اتبعترت
وفي الخيام
الجليد قاعد يقطع
لحمنا…
واحنا بنضرب بعضنا
ولا حد راضي يحلنا
و يراضينا على نفسنا
ما احنا الوطن
واحنا العدو
والعقل ضاع
وبقينا
أخطر مجنونين
واحنا بنغضب ربنا
وبنقتل ولادنا ونفسنا
وكمان بندعي لربنا
يا رب يرحم
وهوَّ يعلم
ان احنا قتلة
ومجرمين
في قصور
والَّا في دور
من طوب وطين
من البرد آه متحصنين
لكن خلاص الولاد
بقوا رماد
ورملة…
وطين
واشتكونا لربنا
وهو يعلم
إن احنا آه
مجرمين
ماحنا عرب
ولد اسماعين
وحتى كمان الميتين
والمتجمدين
مِ القسوة
وضياع الحنين
هما كمان
وِلد اسماعين
ظلمة كُنَّا…
أو مظلومين
ليست هناك تعليقات:
إرسال تعليق