ـــــــــــــــ ســلـم جـناحـه ـــــــــــــــــ
كل الخـطاوي ع السكك سارحه
كـل البـشر م الحـياه ماشـيين
فاغزل حروفك للفـرح طـرحه
وامنع غناوي الحزن م المـيادين
مد الإيدين طبطب على دموعك
سيل الدموع ع الخدود حـراق
والآهـة جـوا صدورنا محبوسه
قـالـوا الأمـل للـجـروح تريــاق
والرك ع الأشواق فاتحه المسام للبوح
غدر المشاعر ليه بيهد الروح
وسع الجروح من قسوة الفرقه
الهجر سايب ألف باب مفتوح
نوح الشـوراع بيبكي م الحرقه
رسم الملامح ع الخدود تباريح
صوت الصراخ ف الوريد مسجون
نبض الآهات مدفونه جوا ضريح
عاشق وغاوي كل قلب حنون
بيحب لكن ، حب ناس نكراه
بدر الاماني خضرت في حشاه
كبرت وضاعت لما جه يحصد
حزين بيحسب لسه فيه أوفيا
والبخت عايز رقوة م الأوليا
سلم جـناحه للهـوى والحظ
سافر على السكه مـد خـطاه
سراب الضـحك نز الآآآآآآآه
غريب بيعافر جوا بير الخوف
بيعد كل المجروحين م الهجر
تايه من كأبة الليل ومل العد
والإنتظار موقعة بتهد عزم وجاه
زاد الوجع في الروح لأنه حب بجد
وفين جـريح الهـجر يلقى دواه ..؟
ـــــــــــــــــــــــــــــــــــــــــــــــــــــــــــــــ
بقلمي الفلاح الفصيح معوض حلمي علي
منشأة بطاش .. تمي الأمديد .. دقهليه
ليست هناك تعليقات:
إرسال تعليق