قصتي وحبيباتي الأربعة.... بقلم الشاعر مرقص اقلاديوس

قصتى و حبيباتى الأربعة
(حكاية ايقاعية باللغة المحكية)
بقلم..مرقص اقلاديوس
..........
حبيت الأربعة سوا
فجر و ضحى و شمس و ليالى.
و لما نويت اغنيلهم
احترت ابتدى بمين فيهم.
و بصيت عليهم.لقيت كلهم الجمال ماليهم.
و عشان ماشفش الدمع في عينيهم.
قلت اغنيلهم بالترتيب.

بصيت على فجر لقيتها مستحية .
و فى عينيها عتب
قالتلى هاتبتدى بيا.
قلتلها كنت فاكر ده يفرحك.
قالتلى اللي يغنيلي
لازم تكون عينيه سهرانة مستنية.
تعد النجوم طول الليل و الليل طويل.
و تصحى الشوق ماليها و الشوق جميل.

بصيت على ضحى
قلتلها فجر مش غاوية غناوى.
و انتى ايه رأيك يا قمر.
قالتلى يا حبيبى أنا مش قمر.
 أنا قدر. والقدر يغلب الكل.
و أنا طبعى يا حبيبى أنا بالكل.

بصيت على شمس لقيتها زعلانة.
قلتلها
مالك يا موزعة النور على الخلق.
مالك يا جميلة يا جميلة بحق.
قالتلى ..طول عمركم يا شعرا.
بتغنوا لليل ما بتغنوش للنهار.
اشمعنا دلوقتي جاي تصاحبني.
و تكتب عنى اشعار.

بصيت على ليالى
لقيتها بتضحك و فرحانة.
جيت ابتدى الكلام
ابتدت هيا الكلام.
قالتلى و الفرحة فى وشها تنطق.
انا اللى بقيالك.
قول يا حبيبى..قول ما بدالك.
ده عشان تغنيلى أنا ربنا ادالك.
إنك تنطق.
      ملاح بحور الحكمة..مرقص إقلاديوس