......بحر عنيك.....
ياما سبحت ف بحر عنيك
وتهت مش لاقى مراسى
رمشك سحرنى وخدنى إليك
وغرقت من ساسى لراسى
ونزلت بحرك وانا بهواك
يلطمنى موج الشوق للقاك
واحلم ياريتنى اكون واياك
واسبح بروحى واحساسى
من خمر رمشك قلبى يدوب
مسطول وتايه كالمجدوب
ولما افكر عنه اتوب
ألاقيك بتملالى ف كاسى
ياما رأيتك فى الاحلام
وفكل رؤيه اقول ياسلام
واكتب فِ حبك احلى كلام
وعشقت قلمى وكراسى
فكرت ياما وقلت انساك
الاقى قلبى وفكرى معاك
والاقى نفسى ف عز جفاك
مشغول بطيفك وانا ناسى
....عادل الوحش.....
ليست هناك تعليقات:
إرسال تعليق