زجلية بعنوان
حرف المطر
السما ب الغيوم عمرات
غيمة ب جارتها تغطات
و التانية ختها وسدات
نزلت قطرات براقة
وزادت صبات شتيوة
وجابت معها الخيرات
الحباب من كل البلدان تلمات
أدباء وأديبات
شعراء وشاعرات
تفننو ف حروف من ذهب
هي بدعات وهو كتب
وهكذا تسربات
خيوط من الغيمات
وعاودت لينا شلا حكايات
القوافي ب الرومانسية تخبلات
و المعاني ب الواقع تطرزات
فمرمة من الما تجبدات
ترسمت الحروف
وتلونات الكلمات
حرة بنت مرة غرة
عنقت العراق سورية
بيروت......... و غزة
و بدموعهم بكات
و بنارهم تكوات
وعلى همومهم دوات
وفسرات حلامهم
خيراتهم تنهبات
حريتهم تسلبات
تشردوا وليداتهم والبنيات
عادو لاجئين ولاجئات
وآش واقع ف بلدان
ب الحروب تدمرات
ورواح كبيداتها زهقات
ف سبيل الحرية استشهدات
عليهم تنظمت قصيدات
ب دم القلب تكتبات
ومواقف إنسانية تحركات
والمحنة ف الجوف توغلات
العين تشوف واليد قصيرة
ما لقات ليهم جهد
لكن خذات على عاتقها عهد
توصل رسالة منطوقة
ب لسان حالهم
صوت الرعد تسمع
والبرق ب ضوو قشع
جهادت الشتا وزادت ف القطرات
ومنهم تنسجات
قصيدة شوق للحبيب
والمرض اللي ساس الصحة
وخوا الجيب
واليتيم اللي تقطعات
به الحبال المتينة
بقا شاد ف الراشي من الغاشي
الويدان ك تكب ماها
ف سد المطر حتى
فاضت المحبة ف روابيها
هذا تغزل ب الطبيعة
وب بهى عيونها تغنا
تبهر ب زينها الفتان
نعايم غطات الفدان
نخل كرم ورمان
غراصي خضرة
تسحر ب النظرة
تدخل على القلب السرور
والبهجة سلمات على الحضور
الورد معطر الدار
ب لوانو الزاهية
ها الجوري ها الحر
الابيض والاحمر
زرعنا السلام
وسقيناه بالمحبة الصادقة
فاتحة سرغيني
ليست هناك تعليقات:
إرسال تعليق