عصفور حزين
شعر هاني الحداد
والدنيا برد ومطر
لمحت فوق الشجر
عصفور حزين
باين عليه متعبي
هموم وياما مخبي
جراح وأنين
ندهتله وقولتله
مالك حزين كدا ليه
فضفضلي وبوح بهمك
تشيله وحدك ليه
وبصوت آها وألم
ودموعه ماليه عنيه
ومابين حيره وندم
قاللي حكايته إيه
أتاري طيره راح
ولاف على غيره
وفاته في الجراح
ولا افتكر خيره
مع إنه كان سعده
سبب فرحه وهناه
خان الخسيس عهده
ودا طبع الحياه
قولت له كفاياك
حزن ودموع وآهات
على باع هواك
ورماك في ذكريات
فوق ياحبيبي وروق
وإنسى أي عذاب
بكره هيجي الضوء
لو تفتح بس الباب
ويروح كل ليل
والنهار هيعود
و قلبك راح يميل
لقلب بيك موعود
أما اللي باع ودك
سيبه ل الأيام
يعيشها من بعدك
ليل وآهات وملام
مشتاق ل ليله بس
من ليالي زمان
لما كان بيحس
وياك معنى الأمان
وآخرت قولي ليك
ربك فرجه قريب
وكل جرح فيك
بالصبر راح طيب
ليست هناك تعليقات:
إرسال تعليق