//////++++ فيدي ناقوس +++//////
عيشة لولاد طيرت نعاسي
وانا كراب يالوليدات
يالعارفيين حالي عز ناسي
كربتي خفيفة على لكتيفات
حظي قسمة حظي مكتوب
ونحاسي يلمع كالفانوس
خيري لناس خيريي مطلوب
هذي سراري فيدي ناقوس
وانا والكربة محرفاني
راها على ظهري مهزوزة
ياسيادي وهذي معوناني
بهذب الماعز ياك مطروزة
هالباسي ناصح لونو حمر
هااكريبتي من جلد العتروس
منها وفيها تعلمت صبر
وانا معيش في حضني نفوس
لكريبة ياناس راس مالي
ماعندي غيركم يالصحاب
لولاد شاطنين ليا باليي
اشكون يخلص يالحباب
ماء لله ماء يالوليدات
ماشي وحدي كثرات لفواه
شربوا وترحموا على من مات
كلنا نتسناو سيدي الله
قلة الشي معروفة ترشي
وللي جاب الله به راضي
غير عذروني هذا عيشي
باش ماكان ياحبابي قاضي
سمطة على بطني مزيرها
فين نمشي والفلس بلية
كل مرة حبابي مغيرها
كلشي ظاهر لما ويديا
حضي ياناس هانا موجود
اصباحي ومسايا ف كل مكان
عيشي في يد داك المعبود
ونواقسي تجلب كل عطشان
//////++++ بقلم صقر الحروف الزجال بوسبولة المحجوب ++++//////
ليست هناك تعليقات:
إرسال تعليق