هاتيلى معاكى حلم من اللى حلمته زمان
ملفوف معاه الفرح ويا أمان
متشفى من الأحزان
هاتيلى الشمس دفينى أنا بردان
هاتيلى القمره تنورلى أنا عميان
متنسيش كام ورده من البستان
بتقولى إن طلبى اسمه جنان
معدش فى سكتك بيبان
غير الضلمه والشوك والعتمه والأحزان
دا حتى الأصيل متهان
مفيش حد بقا شبعان
كله اليومين دى جعان
حييجى منين الحلم يا مسكين
وعلى رقاب العباد سكاكين
فى سكينه بتاعت اهل الدين
وسكينه لحرميين
وسكينه بتاعت زفت الطين
طريق الأحلام مليان سكاكين
كويس اوى أننا يدوب عايشين
غيرنا كتير صارو مدبوحين
يدوب نصحى عشان نشقى على قرشين
ياريتهم بس مكفيين
وننام عشان نرتاح
معدش تنفع الأفراح
مبقاش في زمانا أى براح
بقا كله جراح فى جراح
تعرف أعدموا كام سفاح
كتير ولسه فاضل اكتر من اللى راح
وجاى تطلب احلام شوفها لما تنام
ليست هناك تعليقات:
إرسال تعليق