بتداري ليه .... بقلم الشاعر أحمد عبد الحق

بتداري ليه
بتخبي ليه احساس ماليك
بتبيعي ليه
بعند
بقسوه
قلبي عاش عمره يادوب
كل حلمه يشتريك
-------------------------
احساسي بيك مش كلام
ولاحرف باهت علي الورق
ولا شعور مؤقت ينتهي
ساعه ماينشف العرق
ولا حاله هيام ساعه صفا
ولا هي كفوف متشبكه
ولاحضن دافي ينتهي
مع اول صفاره غرق
حبي ليك حاجه تانيه
حاجه اتخلقت بس ليك
كل مااحبك اكتر
بتداري اكتر احساس ماليك
عارفه لما بحس غربه
او يتوه مني الكلام
عارفه لمااشتاق لحبك
ارسمك كل الكلام
انقشك وشم في جبين
اعزفك لحن الغرام
بتخبي ليه اطهر مافيك
بعد احساسي بيك
صدقيني مفيش كلام
صدقيني بدون مبالغه
حبك علمني حروفي
طلعني من بره خوفي
وعشان مايكتر كسوفي
دوبتي جوايا الرخام
تسمحيلي بدون تجمل
بدون تستر
بدون حجاب
يعني ايه تداري شوقك
وتعذبيني بالغياب
يعني ايه الحرف يعشق
وانت مخبيه الكتاب
يعني ايه كل مااقرب
تبعديني
يعني عاوزه تفهميني
ان احساسي ده وهم
واللي بنا مجرد توهم
او حاله من العتاب
بتداري ليه وتتكبري
هو موصوفلك عذاب
وان كنت شاطره اتشطري
ماانت زي بتسهري
وتفكري
وكل يوم بيدبحك
طول الغياب
قلت سؤالي
مليون تعجب
مع كام سؤال
اقولك بحبك
مستني منك اي رد
اظن من الشياكه لمااسال
حاولي تقوليلي الجواب
احمدعبدالحق