شجرة غرب محترگه
*****
هم مثلك آني اتولعت
شوگ وعذاب وفرگة
مشتاگلك مثل الشجر
وقت الخريف لورگه
يامنيتي مرّي بحلم
ذبلت اشفافي الفرگه
مريني لومثل الحلم
طيفك يلمني بشبگه
ياروحي بعدك اختنگ
وضلوعي تبچي بحرگة
مشتاگه عيني بحسرتك
عبراتي هل مختنگه
يمته انتلاگه بيادرب
مشتاگه روحي الملگه
ضليت بغيابك مثل
شجرة غرب محترگة
ضليت ديوان وعزه
وهمومي هل معتلگة
عود انته تدري بغيبتك
ماخله بجفاك الوكت
بكبودي يوم سافرت
بيدر حزن وي صفگه
كاتلني بيك اني اشتعل
وانتي الولا مهتمه
مرت ليالي وعبرتي
بطرف الوجن ملتمه
دم ابجفاك اني اذرفت
مو دمع لا واشتمه
عطرك يضوگ مخدتي
وتخنگني حيل محبتي
ضليت بغيابك مثل
شجرة غرب محترگه…
عمار المولى
ليست هناك تعليقات:
إرسال تعليق