♦ يا ريت نعقل !!!! ♦ (11)
لما ساعات وساعات ع الفيس بتفوت
وتعدى ايام وليالى ما نسمع لولادنا صوت
نبقى اتجننا !!!!
فلان عامل فيها إنسان
وفلان خروف م الخرفان
فلان يقول يا بلادي
وفلان ينادى الأعادى
فلان بيحب بلده وفى قلبه تحيا مصر
وفلان كسلان ونايم لحد العصر
فلان بيعادى أردوغان وحاكم قطر
وفلان قلبه على رزقه انفطر
فلان عامل زى كدابين الزفه
وفلان عامل فيها صاحب العفه
فلان محترم نقوله يا عمو
وفلان صغير تافه ولا همو
فلان بيشتم بلده والناس
وفلان عامل فيها الحساس
فلان دمه خفيف
وفلان فى ردوده حريف
فلان مسمى نفسه سوكينه
وفلان أغراضه واضحه وباينه
فلان عامل فيها مجنون
وفلان تلاجه بفريون
فلان عامل فيها بيفهم وحدق
وفلان عامل بطل بس على ورق
فلان عامل فيها بحبه كافى
وفلان طلع متجوز وخافى
فلان يا عيني حوش حوش
وفلان طلع فنكوش
فلان كلامه مجرد قص ولزق
وفلان عمر قلبه ما لان ولا رق
فلان كلامه فى الدين
وفلان للست بسرعه يلين
فلان عامل فيها شاعر
وفلان معندوش أى مشاعر
فلان يقول لك صباحووو
وفلان يعتبرك م اللى راحووو
فلان يعمل لك بلوك
وفلان فيك يحك
فلان يا عيني عامل فيها سهتان
وفلان ميعرفش غير البهتان
فلان ....
وفلان ....
كلنا بنحاول نبقى فلان أو علان
نلاقى نفسنا وصلنا لخبر كان
ونبقى بين كتير تعالب وغربان
وتوه نفوسنا بينهم كواحد غلبان
كل اللى أنا عايزو بس أكون إنسان
فلاح دكتور مهندس أو أيا كان
المهم يكون عندى كيان
بعيد قريب أى مكان
ابيض واللا أسمر مش فرقان
المهم أكون إنسان !!
لحد ما نعقل .. هو إحنا هانعقل ؟! ممكن !!!!
♦ خواطر قلمي ♦
طارق على جاب الله
ليست هناك تعليقات:
إرسال تعليق