يا ريت نعقل !!!! ( 7 )
لما ساعات وساعات ع الفيس بتفوت
وتعدى ايام وليالى ما نسمع لولادنا صوت
نبقى اتجننا !!!!
فلان يقول دنيتى وحالى
وفلان يقولك وأنا مالى
فلان عامل واد دكر
وفلان وقت الجد ما يتذكر
فلان بيضحك فى وشى
وفلان يذم لما أمشى
فلان يقول بلادى
وفلان يقول بغدادى
فلان كلامه موزون
وفلان كلامه مجنون
فلان عامل نفسه م الجدعان
وفلان كاره حاسد خوان
فلان لله وحده بيعبد
وفلان للقرش بيسجد
فلان بوستاتو كلها آيات
وفلان بوستاتو كلها شطحات
فلان لبلده يضحى
وفلان لعدوه يحنى
فلان يسد بظرف معاك
وفلان رزل وياك
فلان دايما يطبل
وفلان دايما يهبل
فلان بيضحك على كله
وفلان عارف ولازق في ظله
فلان بوستات يسرق
وفلان فى حوار يغرق
فلان عامل فيها فيلسوف
وفلان ف كلامه حلوف
فلان عامل فيها شجيع السيمه
وفلان معرفته ملهاش لازمه ولا قيمه
فلان زى الطير ف السما يحلق
وفلان لأعز اصحابو بيقصر ويحلق
فلان ولا مؤاخذه مركب قرون
وفلان فيها مفتون
فلان عامل زى الباراشوت
وفلان مصور نفسه بالشورت
فلان تحس إن معندوش دم
وفلان عنده مشاكل ما تتلم
فلان مصاحب اجانب
وفلان مصاحب من كل جانب
فلان بيشيت مع اخوانا الأفارقه
وفلان بيشيت مع الناس الرايقه
فلان تلاقيه صاحب وفى
وفلان تلاقيه صاحب عفى
فلان يقول لك مو صلاح
وفلان يقول لك مش مرتاح
فلان فى الستين
وفلان مش فارقه معاه سنين
فلان مناخيرو لفوووق
وفلان منه مخنووووق
فلان .....
وفلان .....
كلنا بنحاول نبقى فلان أو علان
نلاقى نفسنا وصلنا لخبر كان
ونبقى بين كتير تعالب وغربان
وتوه نفوسنا بينهم كواحد غلبان
كل اللى أنا عايزو بس أكون إنسان
فلاح دكتور مهندس أو أيا كان
المهم يكون عندى كيان
بعيد قريب أى مكان
ابيض واللا أسمر مش فرقان
المهم أكون إنسان !!
لحد ما نعقل .. هو إحنا هانعقل ؟! ممكن !!!!
.... خواطر قلمي ....
طارق على جاب الله
ليست هناك تعليقات:
إرسال تعليق