يا ريت نعقل !!!! ( 3 )
لما ساعات وساعات ع الفيس بتفوت
وتعدى ايام وليالي ما نسمع لولادنا صوت
نبقى اتجننا !!!!
فلان عامل فيها غندور
وفلان ع الناس بيدور
فلان اتغير قلبه
وفلان باين حبه
فلان يقول مستنى الموت
وفلان عايش ع الإستاكوزا وكبد الحوت
فلان ما تستفدش من دماغه ولا حرف
وفلان ينزل بدل البوست ألف
فلان حاطط صورة ورد
وفلان صورته زى القرد
فلان السهر معاه يشجع
وفلان تشوف بوستاتو ترجع
فلان ببوست يهنيك
وفلان بخابور يديك
فلان متعرفهوش ويحمل همك
وفلان تعرفو ومن وراك يزمك
فلان تلاقى الحب معاه
وفلان تتمنالو الوفاه
فلان الوقت معاه ما يكفي
وفلان ع الأونلاين تقول أهو ظهر المخفى
فلان كدا كدا معروف
وفلان دايما تلاقيه ملهوف
فلان عامل فيها شجاع
وفلان أقرع من كل بتاع
فلان بينصح
وفلان بيفضح
فلان بيتكلم في كل حاجه
وفلان بيتفرج من غير ولا حاجه
فلان متفائل وأخباره ساره
وفلان متشائم ويقول إدونى أماره
فلان من حبه يتباس
وفلان فى رخامته نحتاس
فلان واخدها عتاب
وفلان قافل على نفسه الباب
فلان مقدرك وشاريك
وفلان بسهوله يفرط فيك
فلان .....
وفلان .....
كلنا بنحاول نبقى فلان أو علان
نلاقى نفسنا وصلنا لخبر كان
ونبقى بين كتير تعالب وغربان
وتوه نفسنا بينهم كواحد غلبان
كل اللى أنا عايزو بس أكون إنسان
فلاح دكتور مهندس أو أيا كان
المهم يكون عندى كيان
بعيد قريب أى مكان
ابيض واللا أسمر مش فرقان
المهم أكون إنسان !!
لحد ما نعقل .. هو إحنا هانعقل ؟! ممكن !!!!
.... خواطر قلمي ....
طارق على جاب الله
بطل بقى
بطل بقى كتر الكتابه
و الكلام ع إللى راح
بطل تفتح كل يوم
مليون جراح
بطل تقول كانت وكانت
بطل تقول للهم شالت
بطل تقول هى الحبيبة والقريبه
هى الملاك نبض أيام المرح
هى إللى بايديها الفرح
هى النجوم وسط السما
هى الورود لون الوما
بطل تقول مافيش مثالها
بطل تقول الخير ف نورها
كل يوم تنشر تقول
هى فضل هى عدل
هى اجمل م الجمال
روح جميله مافيش جدال
بطل تقول هى الأميرة
هى إللى عملت حاجات كتيره
هى إللى ودت هى إللى جابت
هى إللى بيها حياتنا طابت
هى رحمه ف عين كريم
هى لمسه لليتيم
هى نن العين وعشقه
هى بكره هى بعده
هى اجمل ليل ووعده
بطل تشبهها بصباح
وسعه أوسع م البراح
بطل تناديها ياعمرى
هى شمسى هى قمرى
هى صحيح كانت بشوشه
والضحك واخد اذنها
كانت عطوفه
كرم المصاروه يخصها
مابتشتكيش
ولا ليها ف الزن وخلافه
ممكن تغير بس ف التفكير
سميه
غيره تجعلها تملى
دنيا بالألوان وجايه
بس برضه كفايه قول
غزل نول بخيوط دهب
ف الرقه سبحان من وهب
كل الصفات بتليق عليها
كل المشاعر بين ايديها
الدنيا تبدأ عندها
وتنتهى و تبتدى
ومعاها كل اساطير الامانى
حتى الاغانى
معموله ليها هى بس
مكتوبه حتى ب اسمها
كل يوم توجع قلوبنا بذكرها
بطل بقى
بصيت ومانطقتش كلام
عيدو ياخونا الكلام
بصيت وقولت ف حقها
سميه عمرى
وربنا باحبها
عاطف محمد
10/7/2019
قصيدة :الورد : محسن النجار
ياورد مين اللى شاكيك. .
...... والدمع شايل بصمته
ياورد مين دا اللى يجافيك. ..
.... ..والعطر ماشى .ف . سكته
ياورد شوف اللى شاريك...
........وانت حياته ودنيته
ياورد ليه الشوك معاك. ...
.........والهم سابق فرحته
مين ياحبيبى يقسى عليك .....
.........وانت جمالك يبهره
ياغالى قول للى يعاديك ....
.........حب الجمال من فطرته
ياورد فيه اللى هاويك ......
......... وانت منور ظلمته
ياورد ليك اللى يراعيك. ......
......... والود مالى بسمته
ياورد جنتنا .ف .عينيك.........
........... والطيبه عطر . ف . اخرته
تسلم حياتك والعطر فيك. ....
...........ويا هناه اللى حكايتك توصفه
احمد فرج
سلامى اليكى
٢ يوليو ٢٠١٩
سلامى اليكى وروح السلام
ترفرف عليكى وتنشد كلام
بانك بقلبي واجمل غرام
وعينك حياتى دى نهر السلام
بقربك بحسك بتمحى الالام
ببعدك بعانى وفرحى ينام
وعيشتى معاكى بتنشر غرام
بقلب الاحبة واخر كلام
بحبك بحبك يامالكة الفؤاد
ويكفى ياستى كفاية عناد
ياوردة بقربك ملكتى الفؤاد
وعشقك بطبعه كحالة سهاد
ولازم اقلك كلامى الكتير
بحبك ياستى راح افضل اسير
وعشقك لقلبي مساوى المصير
وقلبي بقربك يستى بخير
عليكى عيونى عليكى تغير
ده منى ومنهم ومن ناس كتير
حِلم أَوَانطه
==========
نِمت ف يوم وحلمت بإنى بأقب وأعيش
لابس لبس ذوانى وقيمه مش من خيش
ساكن فيلا فى مكان راقى ما تقوليش
سِبت العِشه إلا انا باسكنها وسط الهيش
جوا الفيلا سُفره كبيره وياَ كراَسى معاهم نِيش
أوَض النوم مراتبها ناعمة إشي سفنج وإشى ريش
عندى كمان أحدث عربيه قول مرسيدس أومِيسوبيش
ليها شُفير مِتعلم أفندى زى زمان أهل الطرابيش
يومى ياخدنى لأجدع مطعم أطلب رومى وكباب شيش
ف الآخر لما اكل واشرب من جيبى أدفع بقشيش
وانا فرحان ف الحلم كَإنىِ ف الجنه طاير وباعيش
فجأه صِحِيت على صوت حَيَاَنِى قوم يا منيل هات العيش
قومت بسرعه رُحت وجبته وكمان فول وياه تحابيش
وأكلنا وطلبنا الستر هوا صاحبنا غيره مافيش
أما الحلم دا كله أونطه مش عاوزه وما يِلزمنيش
وانا بالواقع رغم مرارته حَاأتكيف وياه وحااعيش
واسعا واحاول أحسن وضعى بس حلال من غير تناتيش
وماليش دعوه باللى حياته أساسها الرشوه والتهبيش
مالها العيشه بستر وصحه وسط الفقرا والحرافيش
============================
( محمـد عنانى )
( إضحك... هتفرج) م/عبد الحميد سالم
مالك يصحبى ماشى متنح
واللى جنبك ماشى مجنح
مهما همومك كانت بتنأح
ففكك منها وانساها وافرح
لتروح فيها وتموت بسكتة
دا المصرى عمره واد ابن نكتة
***
كنت بتمشى ف شارع شهير
قابلنى مطعم زباينه كتير
ومن ريحة أكله عقلى زقزق
دخلت وطلعت لحمة حمير
وساعة الحساب فضلت أنهق
خافوا وجبولى البرسيم عصير
وسابو الخروف ع الباب يمأمأ
*****
فتاوى المشايخ بقت تجنن
ورضاعة الكبير بقت حلال
بقى كل شيخ يفتى ويفنن
ومعاشرة وداع بتحى الوصال
اتجوز طفلة هشتكها وهنن
ومسيرها تكبر وتجبلك عيال
****
مش كل ده حاجات تجنن
وتضحكنا ع الخيبة التقيلة
ف بلاش تيأس دا ربك حنين
ولو فطارك فول وغداك بليلة
ولو كملت عشاك بنوم خفيف
ف خلى أمالك حبالها طويله
تفاؤل واضحك خليك لطيف
قادر يفرجها ف يوم وليلة
