بطل بقى
بطل بقى كتر الكتابه
و الكلام ع إللى راح
بطل تفتح كل يوم
مليون جراح
بطل تقول كانت وكانت
بطل تقول للهم شالت
بطل تقول هى الحبيبة والقريبه
هى الملاك نبض أيام المرح
هى إللى بايديها الفرح
هى النجوم وسط السما
هى الورود لون الوما
بطل تقول مافيش مثالها
بطل تقول الخير ف نورها
كل يوم تنشر تقول
هى فضل هى عدل
هى اجمل م الجمال
روح جميله مافيش جدال
بطل تقول هى الأميرة
هى إللى عملت حاجات كتيره
هى إللى ودت هى إللى جابت
هى إللى بيها حياتنا طابت
هى رحمه ف عين كريم
هى لمسه لليتيم
هى نن العين وعشقه
هى بكره هى بعده
هى اجمل ليل ووعده
بطل تشبهها بصباح
وسعه أوسع م البراح
بطل تناديها ياعمرى
هى شمسى هى قمرى
هى صحيح كانت بشوشه
والضحك واخد اذنها
كانت عطوفه
كرم المصاروه يخصها
مابتشتكيش
ولا ليها ف الزن وخلافه
ممكن تغير بس ف التفكير
سميه
غيره تجعلها تملى
دنيا بالألوان وجايه
بس برضه كفايه قول
غزل نول بخيوط دهب
ف الرقه سبحان من وهب
كل الصفات بتليق عليها
كل المشاعر بين ايديها
الدنيا تبدأ عندها
وتنتهى و تبتدى
ومعاها كل اساطير الامانى
حتى الاغانى
معموله ليها هى بس
مكتوبه حتى ب اسمها
كل يوم توجع قلوبنا بذكرها
بطل بقى
بصيت ومانطقتش كلام
عيدو ياخونا الكلام
بصيت وقولت ف حقها
سميه عمرى
وربنا باحبها
عاطف محمد
10/7/2019
ليست هناك تعليقات:
إرسال تعليق