سنين العمر... بقلم معوض حلمي

( كتاباتي لاتمس حياتي  )
....................................

......... سنين  العمر ..........

....................................

سنين   العمر   .... منقوشه
وباحلم  قاعدة  ...... الكوشه
وجانبي  عروسه ...  واتحنى
وسكه  بورد ....... مفروشه

سنين  العمر  .....  معدوده
وليه  أحزاني ....... مفروده
ممدوده  بحبل  ...... وطوق
على   وسطي    ومشدوده

سنين  العمر  ........ بتعدي
كما    الرهوان   ولا   تهدي
واقول  يمكن   تحن  ف يوم
وترسم   ضحكه  على  خدي

سنين   عمري .....  محبوكه
بتاكل  فيا .........  بالشوكه
ونهر  عذابي ....... متواصل
مفيش   فاصل    ومشبوكه

سنين   العمر ........ جرايه
وحكايه  ورا  ......... حكايه
لا بنفهم  .........  ولا ندقق
ولا  بنحقق ..........  الغايه

سنين  عمري وطايره  لفوق
وسيباني   ماليني   الشوق
أنام  واصحى ...... واتمنيت
أزور  البيت   وبالي   يروق

سنين  عمري  ودايب  دوب
وراضي  يامه .... بالمكتوب
مجروح   وجرحي   يوجعني
وإيه   يعني  أبات   مغلوب

سنين   عمري  بطاطي  لها
تغيب  عني  واحن ...... لها
تشوف  في   عنيا   أحزاني
تغيب  تاني  ......  تشعللها

سنين   وبتعمل  ..... اللالي
سألت   الودع   قال .... لي
هات  لي حته  من ..... توبه
ومكتوبه   يظهر  ........ لي

سنين  عدت  وحملي   تقيل
وسقياني  كاس .....  الويل
م الهم   اتكسر .....  ضهري
وانا  عمري  ما كنت   عويل

سنين  عدت  على  الفاضي
وحظي  بيا  مش ... راضي
وسوء  بختي ...... بيساهم
وانا  فاهم  ...... ومتغاضي

سنين   من   توبي  قلعاني
وانا  الغرقان  في  أحزاني
ولما  حلمت  أحط   ف شط
 لقيت  أحلامي  .... بيعاني

سنين   جايه   وجايبه  غيوم
وأنام  مره  ومره ....  أقوم
وعدي   العمر  .... بالعافيه
يوم  فرحه   وشهر   هموم

سنين  العمر  ليه ... تاهت
ناس   صانت  وناس   باعت
وانا   شايل   على   كتافي
هموم  راسيه  ولا  انزاحت

سنين  عمري  ...... بتلعبي
باعت  شالي ..... وإشاربي
وانا  المغلوب   على  أمري
بداري   ف  جرحي  وبخبي
.................................
بقلمي الفلاح الفصيح
معوض حلمي