موكب حزن
***
متعودّه عيوني السهر
مابطلت تذرف قهر
تشتاگ كسرة خاطري
أي فرح ماظل مابيه
حتى سواليف الغزل
من يبتدي طاري الحچي
مليانه موكب من حزن
نوح ولطم شاطيه
ومشتهيه روحي العبره
چف وجنح منكسره
وكل الحزن لامايرد
الراح من ايديه
لحن وخواطر تنكتب
ماتكتب حروف الندم
ينكتب بس كلمة عتب
اي زعل مامش بيه
سنينك اخذهن من ترد
والصور ووعودك بعد
يلمارد كبودي مرد
شويه على گلبي شويه
ضميت حلمي بغفوتك
رديت منك خاسر
كدرت مايي لصفوتك
يلشابع وهم ناكر
مجروح منك للعظم
شايل جروحك ذكرى
يلمثلت دور المحب
خاين وخنت العشره
ومو انت ذاك الي چنت
الگاك ضحكة تجر فرح
الگاگ غيمه بفي مزن
تمطر دفه وحنيه
يلتضحك بوجهي چنت
تصفن علي من احچي
ليش الملامح غيرت
والصور صارت تبچي
والدنيه مو ورديه
يالبايع احلامي برخص
وسديتهن بيبانك
ماضگت منك اي فرح
ماشفت بس احزانك
ويلي محطاتك شگه
وريلك يصيح الفرگه
مر بمسافاتي بحلم
مرة بحياتي وتلگه
ضامملك بروحي ورد
لايخلص ولايذبل
وغطيتك برمش العين
بس وجنتك ماتخجل
يبست محنتك والغصن
ورگاتهن كلهن هون
ماشفت غير معاتبك
اخضر يرد يوميه
شيفيد لوغصن الهوى
اسود فحم ميت عطش
نام الخراب ابفيه
سنتين وانه اتحملك
شايل خلگ ليل بدوي
مايخلص ولاينتهي
ومتوسد بخاچيه
يلعلمتني على السهر
يلعودتني على القهر
گبلك چنت متونس
ولا هم ولا حس عبره
ولاهز دليلي ولا هوى
أي شگره او أي سمره
شجابك لدربي وكسّرت
حيطان گلبي ومددت
تغطيت بضلوعي ونمت
عتيت ميزان النبض
وتوسدت شرياني
بيدك مفاتيح الگلب
وي النفس چنت الهوى
شوصرت ضو لحزاني
وحسبالك الشعر الكتبته
بعينك الجانت تحب
حبر أنكتب فوگ الورق
لاهزني لا أذّاني
سنتين هم اكثر بعد
مُّر بخواطر وحشتي
تلگه العشگ لعيونك
گاعد بنص وجداني
خايف تطّول غيبتك
واني بعذابك انتظر
والروح تعّبها الصبر
يمكن ترد بعد العمر
تلگة الگصايد تنتظر
بس آني ماتلگاني
عمار المولى
ليست هناك تعليقات:
إرسال تعليق