قصيدة بعنوان
(من بعضنا؟؟!!)
من بعضنا نفترق أسهل
مانتعارك...
وأنا بالذوق هالم خلاقاتي.
وأرحل بعيد في هدوء
وإنتي بقى في حالك.
وليه نسب وندب ونعملها
للعدوين قصه.
ما نسيب حقدهم في قلوبهم
وحسدهم يعمل لهم غصه.
ونروح كل مننا في هدوء
وننسي مين في الحوار بدء
ومين ال كان شارك.
أنا عن نفسي ليكي مسلم.
ورافع إيدي الجوز
لا هاعمل فيها فركوك
ولا راجل عنطوز
ولا سبع رجاله
في بعض ولا أعوج
حنكي ولا أمد بوز
وهاندم على كلامي القبيح
إذا كان مسك بسوء
أو بالعيوب طالك
مين ينسي إنا كنا روحين
في جسد توأم بنخزي العين
لولاش العند ال فيكي
والشيطان بوسوسته أوحالك
تبعتريني بكلام وتنتني
وتنفردي معجبة بطولك
وتهوشي بإيديك
وتبصي بنص العين
وتقطعي بشالك.
من بعضنا نفترق أسهل
ما نتعارك......
أنا عارف إن حواء ما يخللهاش
بلاد إن هاجت أو ماجت.
أسد كاسر استحاله تنكسر
بدمعتين أتنين وحبة
شنهفه يركعوا آدم
في الهيام ويدوب وينسى
إن من حبة رافع الحاجب
وبيعض شفته من الغيظ
وكأنه تور سانن قرونه
وفي النطاح هالك
من بعضنا نفترق أسهل
مانتعارك.....
بقول لك ماتيجي
قبل العراك مايدوم
والحرب تاخد وضعها.
و القيامه تقوم.
ناخد هدنه ونفس
ونستريح من العراك اليوم
نزل كلامي عليها
سهم الله وكأنا ما كنا
من شويه خصوم.
قالت وبكل هدوء
طيب أنا موافقه وليه
ما نعترفش بغلطنا وعلى
المحبه ندوم.
قولت لها بعد ماشديت
نفس من شهيق وزفير
وأتهمدت من الفرهده
على السرير كان
إيه ال دخل الشيطان
بينا ولا الجنون
جالك......
...9/2/2024
(ترنيمات وخواطر.بقلم..........)
(شاعر العاميه/خيرى حسنى.)
ليست هناك تعليقات:
إرسال تعليق