وحشنى صوتك...مروة محمدفراج

شفت إمبارح على فكرة.. 

ايدك حوليا بتحضنى 

وايديك التانيه ماسكه ايدى.. 

بتهون عليا تطمنى  

وبقولك فينك من زمان

وحشانى قعدتنا فكل مكان 

ووحشنى صوتك ياأبويا 

من بعدك مين أديله أمان 

فاكر لما كنت بضفاير 

وقلبك كان بيا طاير

من الفرحة وبتقلى يابنتى.. 

جيتى وهليتى بالبشاير 

راح أشيلك دايما فوق راسى 

وحتبقى فشيبتى عكازى 

عمرى ممحس بالوحدة.. 

ماأنتم حوليا أهلى وناسى 

بإيدى راح تعيشى ملكة.. 

حقطع من لحمى وحديكى 

وفعز البرد وأيامه.. 

حفرش ضلوعى تغطيكى

وكل لحظة بتعدى.. 

فعمرى  أنا راح أهنيكى 

واقف ورا ظهرك راح أمحى.. 

كل اللى يفكر يعاديكى  

وحسبلك ذكرى من بعدى.. 

بأجمل هديه أنا بهديكى

سيره أبوكى الطيب.. 

اللى مكنش غير ليكم 

ظهر.. سند.. بروحه يفديكم 

وفعزى ياما أتمتعتى.. 

وخيرى كله كان ليكم 

فجأه مشيت على سهوة

مشربتش  شاى أو قهوة

طب كنت استنى أشبع منك 

أشبع من حضنك من ضمك 

سندى يابويا وعكازى 

أتكسر ليه طيب ماشى 

أديت رسالتك كده خلاص.. 

علمتنى كل شئ أساسى 

بس يابويا معلمتنيش 

أزاى من غيرك أقدر أعيش 

بتنمى اقابلك فالجنة

مع بعض نفرح نتهنى 

وأقولك اهو ربك عوض.. 

تعبك وتعبى فالدنيا 

دانا عمرى يابا منسيتك.. 

فيومى ولا حتى ثانية

وأتمنى دايما.ً أرفع راسك 

فسنينى وحياتى الجاية

بقلم /مروه محمد فراج