افرحي يامه أهو جانى الواد
***************
وعــدى العمــر ..بينــا وطــار
ونا من يوم
... مابعدتى يا غالية
قــاعد وحـــدى كـــدا محتـار
وفى نص الليل ..نازل أفكر
معقولة يامه
بعد ما كنت أعيش ف مـرار
ياجى ولى العهد وياخد
نفس ملامح .. نــاس دغــار
معقولة يامه .. بعد ما شبتْ
وبعد الناس ما لامتنى
وجبت .... تلات قمرات
يطلع قولك .. كله هزار
بس المشكلة فيهم يامه
إنو جناحهم كان مكسور
ونا علشان أراضيهم يامه
قبلت أكون زى الطرطور
شفتى الخيبة ... وشفتى العار
معقوله يعنى .. آجى دى الوقت
واعمل نفسي فتــوة حارة
..... كأنى بقيت شمشون جبــار
كل الناس هتقول دى حقارة
وهينزل اسمى ببنط عريض
... ف أول صفحة من الأخبار
وبعد ده كله
جايه دى الوقت .. تقولى خلاص
عايزاك تفهم ..يـاد يا حمار
ربك لما يريد يراضيك
يقوم يعطيك
.. نفحــة بسيطة من الأســرار
كل نصايحك – يامه – حافظها
وبفضل دعائك
طاقة القدر اتفتحت ليا
وربك بدرى شاء واختــار
وأهو جانى أخيرا ... واد أمـور
ورحمة أبويا – يامه – ف قبره
جوه عيونى
عامل زى أحسن دكتــور
لو شفتيه ..... هتفرحى بيه
و هيشبط فيكى كما المسعور
ولمــا هيكبر .. بكــره ويمشي
بين الخلق ....
هيملا كل الدنيا سرور
وأول مرة الناس هتشوفه
كله هيهتف ...
وسع يا ابنى للمأمور
وياكى تسألي كيف ... والزاى
ما انتى لوحدك .. عارفة أساي
ولا نسيتى
كأنك يامه أهو قاعدة معــاى
ونازله تجهزى
زى العــادة ... ليــا عشــاى
ولما الونسه بينا تطول
تقولى معقول
قاعد ترغي
ومش هتجيبلى .. شفطة شـاى
نفسي يا ولدى... أشوف لك واد
ويوم ما هياجى
يبقي خــلاص ... حققت مناى
وفجأة رحلتى
وسبتى هموم الدنيا بحالها
فــوق أكتافى .. لوحتْ عنقي
وخلـــتْ وشي
... ف وسط قفــاى
فاكره يا غالية نصيحتك ليا
ابقي دايما – يا ابنى – صبور
ربك عمره ما ينسي عبيده
وف آخر الليل ..
كله يا ولدى ... ينــــام مجبور
مش تستعجلْ ..
بكره يا ولدى ... هياجى الـواد
وهيبقي عريس ... لبنات الحور
روح يا وليدي ..
قلبي وربي عليك راضيين
ودايما تبقي بين الناس منصور
بس إياك ..
يا حبيبي ف مرة
يدخل قلبك أى غرور
ولما رحلتي .. يا ست الكل
فضل القلب عليكى مقهور
افرحى - يامه – أهو جانى
سُهيل
حتة قمره .. جابها المولي
فى نص الليل
أما الصوتُ ..
فذاك موسيقي .. . تشبه صوتَ
صهيل الخيل
ونــا وصيته ... زى مــا قـلتي
يكون متساهل بين الناس
يمسح دمع عيــون مظلومة
عــدى عليها القطر ... وداس
يقف جنب فقير محتاس
ويقتل كل جبان خناس
يصلى الفجر ف وقته تمام
ينظف قلبه من الوسواس
ويطلع شاعر...
زى أبـوه
بس يفوقه ......وياخد الكأس
يبقي ملاك على هيئة شاعر
عارف إيه معنى الإحساس
يعشق رمش عيون سهرانه
... ويلعن شعر أبو نواس
وياجى قدام الخلق يقولك
يا ست الكل ...
لو ينساكى العالم كله
أنا مستاهل ..
ابقى ف رجلك .. كعب مداس
شعر / حمودة سعيد محمود - الشهير بحمودة المطيري
ليست هناك تعليقات:
إرسال تعليق