يا للعجب!!... الشاعر محمد العراقي ....

يا للعجب !

لما الرجال تغدر تخون لازم تقول يا للعجب !

لما الحبيب يقسو و طيفه عن عيونك يتحجب

لما يفيض بيك الألم تصرخ تقول يا للعجب!

لما العيون تبكي القلوب لازم لدمعها تنتحب

لما حبيبك يهجرك يبعد يغيب من غير سبب

لما يبيعك بالتراب و انت اشتريته بالذهب

لما تخبيه في العيون و هو من قلبك هرب

تشعر بهم عليك تقيل و نار في قلبك تلتهب

و ساعتها من حقك تقول طيب دا ليه يا للعجب!

لما السماحة خلاص تموت و الود يصبح مُغترب

لما الوفاء يبات غريب و قلوبنا يسكنها العطب

لما يضيع بينا الأمان و الظلم دايما يُرتكب

لما الظلوم يبقى بريء و الضحية بينصلب

لما تدوق طعم المرار و تحترق زي الحطب

تتمنى إنك ما اتولدت أو ان اسمك ينشطب

من دنيا قسوتها زيادة و حق فيها بيُغتصب

تتمنى ان الوقت يجري و العدل زمنه يقترب

و تشوف بعينك الصراط على جهنم مُنتَصِب

و الكل منتظر الحساب مكروب وخايف مُرتَقِب

ساعتها يعتدل الميزان والظلم لازم ينضرب

أمام حكم عادل كريم يعطي و يمنع أو يهب

ساعتها من هول اللقاء مفيش خلاص يا للعجب

من كلمات و إلقاء الشاعر المصري /

محمد العراقي في 19 / 6 / 2015 م