رباعية العيد .. بقلم الشاعر معوض حلمي

القصيدة الرمضانية كاملة ثلاثون رباعية
بما فيهم  رباعية  العيد
كل  عام  وانتم  بخير  وصحه  وسعاده

..............  رباعيات  الكلمة  ..............

 (  ١  )                         
هليت  ياشهر  النور والرحمه جايه معاك
الكلمه   لو   دستور   بيتم   نورها   بهاك
نضف  ضمير  الناس  وافتح بيبان الدور
خضر   قلوبنا   البور  يمكن  نتوب  وياك

(  ٢  )                       
الكلمه زي السيف والعدل أصل الشريعه
العدل إسمه لطيف رحمه بنسايم وديعه
والظلم  نار   قايده   بيطفي  نور  الروح
بالعدل نبني صروح تعلى وتصبح منيعه

(  ٣  )                       
الكلمه  زي   الوتد    والخيمه   محتاجه
تداري  عيب  الجسد  من  نظره  غناجه
نلم   بذر   القيم    ونبدره   في   روحنا
يطرح   نغم    بوحنا   بقصيده   وهاجه

(  ٤  )                       
إسمع   لقلب  الطير  بيغني  لو  مجروح
فإياك  تسيب  كلمتك  تفتح بيبان النوح
وإياك  تبوح  بالألم ، تكسر جناح  المرح
بكره هاتطرح فرح وتطيب جراح الروح

(  ٥  )                       
الميه  والخضره   سبب   أصيل  للرعي
وسكة  الشهره  عايزه  التعب   والسعي
وكلمة   التنوير   تملى   العقول   بالنور
تفتح    بيبان    الدور    وتنشر    الوعي

(  6  )                       
ياعم   أصغر   ناموسه  بتغلب  العنتيل
والكلمه     نور    يسرج   ضلام    الليل
لو   خدت   بالك   من   حروفك   أولي
راح   تبني  دوله   بالحق  مش   تهليل

(  ٧  )                       
الكلمه   زي    الدهب     بين   محاسنها
عبيها   جوا   الكتب   بعد   أما   توزنها
وخلي    إسمك    عليها    آيه    ومرايه
والخلق    قرايه    تغلي   اللي    يوزنها

(  8  )                       
وتر  الرباب إشتكى  ،  من  آهة المواويل
فضحني دمع البكا ، خلصت كوم مناديل
والكلمه  لحن  جميل  يملى المشاعر دفا
يسرح  مابينا  الوفا ، نسرج كما القناديل

(  9  )                       
الكلمه   ممكن   تصدى   ويضيع   بهاها
حاجي   عليها   وعدي  ،  سنفر  صداها
إياك   تخاصم   وحي   .........   إلهامها
وتسيب    لجامها   ،   لشيطان    غواها     

( 10 )                       
أمرت  سن القلم يكتب حروف ع الكيف 
لقيت  قوام  القلم   زعق  وقال  يالطيف
نهر   الدموع    وافي  زي  سيل    الندى
وإزاي حياتكم كدا عايشينها رغم الزيف

( 11 )                     
كلنا   شعرا   ولكل   شاعر    ....   معني
بالكلمه   نبني   وطن   بالحب   يجمعنا
مد   إيدك   لإيدنا   نلحم    اللي   إتشق
يكبر   براااااااااح   الحق  ....   ويساعنا

( 12 )                     
الكلمه    حلوه    بالرضا    تطرح    هنا
واحنا  راضيين   بالقضا    فرح   وضنا
عاملين   حسابنا   للسفر  واخدين  عبر
نعبر    سقر    ،    ونروح    لجنة    ربنا

( 13 )                     
إيدي  في  إيدك  ،  نعمل حساب  بكره
نبدر   حروفنا  ،   تنفعنا   في   الذكرى
والكلمه   مجداف   ،   بتغلب   الموجه
والدنيا   لو   عوجه    نعدلها    بالفكره
           
( 14 )                     
كل  اللي  باقي  في   قلبي  كسر  قزاز
وحبة  حروف متشالين للخريف  عكاز
بين   السطور   سارحين   حلاوة  روح
وتر   الغنى   مبحوح   والأماني   نشاز

( 15 )                     
الكلمه     قبل     بحورها    كانت    نور
شافها   الخليل   سطر   للمعاني   بحور
رص  القوافي  بمعلمه   قام   جن  ناسه
عالنوته رتب جناسه بان الكلام مسحور

 ( 16 )                     
سرقني كابوس من نومي صحيت حرنان
أداري  همومي  في  هدومي  وانا الغلبان
وقلت   أتدارى   من   بختي   لا  يلمحني
وانا  المعني   بااوضى الكلمه  م  البهتان

( 17 )                     
أبدر  ياواد كلمتك ع السكه  نور  ودليل
وارويها  من همتك متخافش عتم الليل
خلي    قلبك    دليلك   ،   وسيبها    لله
دا اللي شيطانه غواه حياته غلب وويل

( 18 )                     
إحنا  اللي   اشترينا  بكوز  دره   مساطر
كلمتنا حد المسطره في الصعب بتخاطر
بنكره   النأوره    والضحك  ع  المخاليق
عشان   المرجله   تليق   ونجبر   الخاطر
             
( 19 )                     
ياكلمه   قومي   اسرجي   لمعي  المعني
" إقرأ "   دليل   منهجي   ونبينا   جمعنا
مدى  الإيدين  إفرجي  عبينا  بالكرامات
لاجلن   نعود   اخوات  ونداوي اوجاعنا

( 20 )                     
النيه     لو    عوجه    بتزود     الأوجاع
والكلمه    مسروجه   محتاجه    لشراع
يوصل   مراسيها    ويعدي    بيها  النوه
عشان    تزيد    قوه    وتغير   الأوضاع

( 21)                     
إنتم     وانا     الكلمه     حضن    يلمنا
النيه     بيضا    ،    والملايكه      تزفنا
رافعين  إيدينا  بالدعا  والشوق  حنين
ماشيين في سرب  الآمنين   زال  همنا

( 22 )                     
وحلفت   مااكتب   كلمه   .....    مؤذيه
هاعمل   حروفي    جسر  ....   ومعديه
واقيم  ع الجهل   الف   حد  ...... وحد
ادفن  شيطانه  ف لحد وامشي ع النيه

( 23 )                     
رويت غيطان الموز حمل سباطو وطرح
فتحت  غلف   الكوز  والموزه  قد  البلح
إفرد  ياعم  البوز  رص  الحروف عناقيد
ولع شموعك قيد ، دا  الحزن  بعده فرح

( 24 )                     
الكلمه   تطرح  طيب  ،  وتكسر  الالغاز
شرط   النوايا  تطيب  ونسعى  للإنجاز
ليه  سيبنا   الحمام  باع  الهديل  للنوح
عبى  البناني  جروح  بعد  أما  كنا عزاز

( 25 )                     
سيرتك  ياواد في البلد بتمد بين الناس
فاكتب  حروفك  مدد  بدافع  الإخلاص
البرد زاد ع الغطى وف الحشى مطروح
يارب  داوي  الروح  ومد  إيد  الخلاص
                 
  ( 26 )                     
حكم    الإله    ربنا    عادل   وعهد   الله
والكلمه  سنة  نبينا   فيها  طوق  ونجاه
والحق    نبراس   فاتح  طريق   للهدايه
والكره  دا  غوايه ، والحب  روح الحياه

( 27 )                       
الساقيه  عايزه  تدور  ،  جهز   غيطانك
والفجر   جاي   بالنور  ،  إفتح   بيبانك
عطر  معاني  الكلام  ،  واتغطى  بالعفه
خلي   قلبك   دفه  ،  واطرد   شيطانك

( 28 )                       
الكلمه      فاسك    ،     عزك     وناسك
باقيه        بعدك     ،    دهبك   وماسك
دي     موهبه    ورب    العباد     وهبك
إرويها      نهمك    ،  ونبض   إحساسك

( 29 )                     
الحقد    نار    قايده   والكلمه   تطفيها
ليها   ميت   فايده   سر   الحياه   فيها
( عيسى  نبى   ..........  موسى  نبي )
وسيدنا    النبي    زاين  .......  معانيها

                 ( رباعية العيد )                       
الحمد   لله   إني    يانااااااااس   حساس
باكتب  كلام  ع الكيف بيعطره الإحساس
هلت ليالي العيد  ،  وقلبي  ليكوا  انشرح
يجعل حياتكوا فرح والسعد يملى الكاس
....................................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية